سبحان الله
سبحان الله حكاية صارت قبيلة.
ليوم وأنا داخل للمسجد نصلّي قبيلة,
واحد من الفصايل ال...معروفين في الحومة, وقفني قالي ورّيني كيفاش نتوضّى...
لحقيقة استغربت نستخايلوا مقرمش والا شنية حكايتوا خاطر السيّد معروف ديما بعركوا وكفرانوا لربي وشيختوا في راسوا وموشّم على ساقيه ويديه وهاك الجو...
وريتوا كيفاش, توضينا, ودخلت يخي دخل معايا,
صليت تحيّة مسجد,
تبّعني..
مباعد قعد بجنبي يسأل فيّا كيفاش صلاة المغرب وكيفاش صلاة العشاء و .. و... و ...
وسّعت بالي معاه وحكيتلوا كيفاش...
أقاموا الصلاة وقفنا باش نصليّوا...
الإمام متاعنا تبارك الله شيخ صوتوا باهي ويرتّل مليح,
هو يقرى في الفاتحة,
وصل لـ "إهدنا الصراط المستقيم, صراط الذين أنعمت عليهم غير المغضوب عليهم ولا الظالين"
والسيّد اللي بحذايا تطرشق يبكي يبكي يبكي بالشهقة وهو يصلي ودموعوا هابطة على يديه...
في الركوع كيف كيف,
في السجود أقوى وأشدّ...
حصيلوا ماكمّل الصلاة كان ما حممّلي قلبي بالبكاء...
دفعني الفضول باش نسألوا شبيه يبكي وكيفاش هداه ربّي باش يوليّ يصلّي...
طلّعوا آش قالي؟
قالي "ريت فيلم في نسمة لبارح لكلوا كفر, جايين فيه مصوّرين ربي,
ويحبوا النساء تسكر وتتكيف زطلة وترقد مع الرجال وتفسد,
يخي خفت لا ربي يخسف بينا الأرض وأنا مازلت ماتبتش,
يخي من الصباح بقيت كل صلاة نحب ندخل للجامع نصليّ أما نحشم من ربي كيفاش كنت السنين ليفاتت لكل ومن العباد خاطرني مانعرفش كيفاش نتوضى وكيفاش نصلي.."
سبحان الله ولله في خلقه شؤون...
--------------------------
أحمد لي يحبكم في الله